«Internationalization of higher education institutions: International visibility of HEIs» семинары 23-24 ақпан 2023 жыл.

2023 жылғы 23-24 ақпанда Қ. И. Сәтбаев атындағы Қазақ ұлттық техникалық зерттеу университетінің базасында ҚР ҒжЖБ жоғары және жоғары оқу орнынан кейінгі білім комитеті және Болон процесі және академиялық ұтқырлық орталығының бірлесіп ұйымдастыруымен  халықаралық қызмет жөніндегі проректорлары, халықаралық ынтымақтастық департаменттерінің директорлары, ҚР жоғары оқу орындары декандарының орынбасарларына арналған практикалық семинар өтті.

Бүгінгі таңда бүкіл әлемде интернационалдандыру мәселелеріне білім зерттеушілері, теоретиктер мен практиктер тарапынан да, билік пен жалпы жұртшылық тарапынан да ерекше назар аударылады.

Қазақстан барлық деңгейлерде білім беруді интернационалдандырудың нақты мақсатымен сыртқы әлемге бағдарланған өршіл ұлттық білім беру бағдарламасын қабылдады. Қазіргі уақытта Қазақстанның жоғары білім және ғылым жүйесі АҚШ, Еуропа және Ұлыбританияның жетекші білім беру ұйымдарымен бірлесіп халықаралық ынтымақтастықты белсенді түрде кеңейтіп, нығайтуда.

Аталған семинардың мақсаты интернационалдандыру тетіктерін жетілдіру бойынша ұсыныстар әзірлеу, сондай-ақ ҚР жоғары оқу орындарында интернационалдандыру деңгейін өлшеуге арналған құралдарды әзірлеу болып табылады.

Спикерлер ретінде ҚР Ғылым және жоғары білім министрлігінің өкілдері, АҚШ, Еуропа, Ұлыбритания елшілігінің дипломатиялық миссиясының өкілдері, сондай-ақ халықаралық білім беру және мемлекеттік құрылымдар саласындағы сарапшылар тобы сөз сөйледі.  

Семинардың бірінші бөлігінде АҚШ елшілігінің, ЕО Өкілдігінің, Британ Кеңесінің және "Болашақ" халықаралық бағдарламалар орталығының спикерлері сөз сөйледі.

Спикерлер ҚР жоғары оқу орындарымен халықаралық ынтымақтастықты дамытудағы жетістіктерін атап өтті. Семинар барысында Қазақстан мен АҚШ, ЕО және Ұлыбритания ЖОО арасындағы жоғары білім беру жүйесіндегі халықаралық әріптестік табысты дамып жатқандығы және тек нығая түсетіні атап өтілді.

Семинардың екінші бөлігінде әл-Фараби атындағы ҚазҰУ QS, WUR, THE рейтингтеріндегі жетістіктерін көрсетті, сондай-ақ Шоқан Уәлиханов атындағы Көкшетау мемлекеттік университетінің өкілдері "Shoqan Global Instagram and Shoqan Global Website" жобалары шеңберінде шетелдік жоғары оқу орындарымен әріптестік қарым-қатынасты іске асыру бойынша табысты тәжірибесімен бөлісті. Қ. Жұбанов атындағы Ақтөбе өңірлік университетінің өкілдері жетекші шетелдік ЖОО-мен Қазақстанда филиалын ашу үшін өзара іс-қимыл жасау туралы презентация жасады.  Семинардың екінші бөлігінің соңында Манаш Қозыбаев атындағы Солтүстік Қазақстан университеті Аризона университетімен стратегиялық серіктестікті жүзеге асыру тәжірибесімен бөлісті.

Жоғары білім беруді интернационалдандыру студенттер мен оқытушылардың академиялық ұтқырлық деңгейімен, оқу жоспарлары мен бағдарламаларын интернационалдандырумен, өңірлік және халықаралық ЖОО желілерін құрумен сипатталады. ЖОО ғылымын интернационалдандыру халықаралық бағдарламалар шеңберінде бірлескен ғылыми зерттеулер жүргізу, білім беру қызметтері мен ғылыми жетістіктерін экспорттау арқылы жүзеге асырылады. Ғылыми зерттеулерді интеграциялау және интернационалдандыру бірлескен зерттеулер, халықаралық конференциялар өткізу және оларға қатысу, ғылыми зерттеулердің нәтижелерін шетелдік журналдарда жариялау, халықаралық гранттар беру кезінде ғылыми зерттеулер жүргізу арқылы іске асырылады.

Семинардың үшінші бөлімі интерактивті пікірталас форматында өткізілді, онда семинар қатысушылары көптеген практикалық тапсырмаларды орындады және нақты тәжірибеден алынған кейстерді талдады. Студенттер мен профессор-оқытушылар құрамының академиялық алмасу бағдарламалары, шетелдік студенттердің рекрутингтік науқаны, сондай-ақ шетелдік профессорларды тарту бағдарламалары арқылы интернационалдандыру мәселелерін белсенді түрде талқылады.  

Соңғы онжылдықтардағы ең маңызды тенденция - бұл қоғамдық өмірдің барлық салаларын, соның ішінде жоғары мектепті қамтитын қуатты интеграциялық үдерістер болып табылады. Жоғары білім мен ғылым әлеуметтік дамудың жаһандық факторына айналып, ең маңызды ұлттық және жалпы әлемдік басымдықтардың қатарына енуде.

Семинардың төртінші бөлімінде қатысушылар ашық диалог алаңы форматында бірлескен және қос дипломды бағдарламаларды іске асыру мәселелерін талқылады, онда Академик Е.А. Бөкетов атындағы Қарағанды университеті, Абай атындағы Қазақ ұлттық педагогикалық университеті, Манаш Қозыбаев атындағы Солтүстік Қазақстан университеті, Мұхтар Әуезов атындағы Оңтүстік Қазақстан Университеті және Есенов университеті өкілдері баяндама жасады.

Талқылау барысында білім беру мен зерттеулерді интернационалдандыруды іске асыру бойынша мысалдар мен кедергілер айтылды, сондай-ақ заманауи талаптарды ескерумен университеттерді интернационалдандыру стратегиясына енгізуге болатын ұсыныстар айтылды.

Семинар соңында қатысушылар интернационалдандыру үдерістерінің сапасына бірлескен баға беріп, ҚР университеттерінің халықаралық қызметін стратегиялық жоспарлау бойынша өз пайымдауларын жасап шығарды.